ԽՍՀՄ ժողովրդական արտիստ Արմեն Ջիգարխանյանը խոստովանել է, որ իրենից 44 տարի երիտասարդ Վիտալինա Ցիմբալյուկ-Ռոմանովսկայայի հետ ամուսնությունը մեծ սխալ է եղել: Նա այդ մասին նշել է «Пусть говорят» հաղորդման ժամանակ: Դերասանը դուրս է գրվել հիվանդանոցից, իրեն լավ է զգում եւ պատրաստում է իր հետագա քայլերը: Հաղորդման ընթացքում նա խոսել է Վիտալինայի հետ հարաբերությունների մասին:
«Ինձ համար սա ողբերգություն է: Մեր տարիքային տարբերությունը շատ մեծ էր՝ 50 տարի, սա արդեն գրեթե ողբերգություն է, եւ մենք միմյանց ընդառաջ գնացինք, կարծես թե, մենք ուզում էինք դա: Ես չեմ հրաժարվում իմ ոչ մի որոշումից, բայց, եթե մարդը գող է…»,- ասել է նա:
Ջիգարխանյանը հայտնել է, որ պատրաստվում է կարգի բերել գործերն իր անունը կրող թատրոնում, որի տնօրենի պաշտոնից Վիտալինան օրերս, իր դիմումի համաձայն, հեռացել է: Դերասանը հաստատել է, որ ցանկանում է ամուսնալուծվել երկրորդ կնոջից, սակայն առաջին կնոջ՝ Տատյանա Վլասովայի մոտ չի վերադառնա: Հաղորդավար Դմիտրի Բորիսովի դիտարկմանը, որ, քանի որ Վիտալինան վերցրել է նրա տները, նա կարող է ժամանակավորապես ապրել Տատյանա Վլասովայի հետ այն տանը, որն իրենց երկուսին է պատկանում, Ջիգարխանյանն ասել է.
«Տղաս պետք չէ անել դա: Մի համոզիր ո՛չ ինձ, ո՛չ նրան: Սա իմ կյանքի ամենացավոտ էջն է, եւ կարծում եմ՝ նաեւ նրա կյանքի»,- ասել է նա:
Հաղորդման վերջում զանգահարել է Տատյանա Վլասովան եւ նույնպես նշել, որ պետք չէ փորձել միավորել իրենց:
«Пусть говорят»-ի տաղավարում է եղել դերասանի մտերիմ ընկերը՝ Արթուր Սողոմոնյանը: Նա այն անձանցից է, որոնց Վիտալինան օրեր առաջ մեղադրել էր ամուսնուն առեւանգելու մեջ: Սողոմոնյանը նշել է, որ Արմեն Ջիգարխանյանին կօգնեն լուծել բոլոր խնդիրները, ու նա անտուն չի մնա:
