Կառավարության նիստում հաստատվել է «Մաքուր Հայաստան» գործողությունների ծրագիրն ու միջոցառումների ժամանակացույցը: Նիստից հետո, լրագրողների հետ ճեպազրույցում, Տարածքային կառավարման և զարգացման նախարար Դավիթ Լոքյանը մանրամասնել է, թե ինչ է նշանակում ծրագիրն իրականացնելիս կիրառել կոշտ վարչական ռեսուրսներ:
«Օրենքը, որը մենք փոխանցել ենք Արդարադատության նախարարություն, շատ կոշտ մեխանիզմներ է պարունակում: Նվազագույն տուգանքի չափը 16 հազար դրամ է, խոշոր ձեռնարկությունների համար այն հասնում է մինչև 200-300 հազար դրամի»,- ասել է Լոքյանն ու հավելել, որ օրինակ, ծխախոտը գետնին գցող քաղաքացին կտուգանվի 16 հազար դրամով:
Լոքյանը նշել է, որ ինչպես տուգանք են վճարում երթևեկության կանոնների խախտման դեպքում, այնպես էլ կտուգանվեն միջավայրը աղտոտելու համար: Նախարարը տեղեկացրել է, որ քարոզչական նյութեր են պատրաստել. հատուկ բաժակներ, գլխարկներ, որոնց վրա կլինեն կոչեր:
Հաջորդ տարի շուրջ 10 000 աղբաման է գնվելու:
